Iniciatiwna skupina za zachowanje Serbskeje srjedźneje “Šule Ćišinskeho” w Pančicach-Kukowje

Kontaktna adresa:

Stefan Rjeda

Młynska 3

01920 Pančicy-Kukow

Pančicy-Kukow, 31.8.2007

Domowina

Póštowe naměsto 2

02625 Budyšin

Česćeny předsyda Domowiny, česćeni nawodni zastupjerjo Domowiny,

Kontury předwidźaneje wokrjesneje reformy w Sakskej so přeco jasnišo wukristalizuja. Z nastaćom noweho wokrjesa Budyšin dyrbi so wo serbskej srjedźnošulskej syći znowa rozmyslować. Sejmik nětčišeho Kamjenskeho wokrjesa je so w tutym nastupanju jako nimoměry njekompetentny wopokazał. Wjacore razy smy jako iniciatiwna skupina na hrožace wuwiće w zwisku ze zawrjenjom “Šule Ćišinskeho” skedźbnili. Kak jara bě to woprawnjene, pokazuja rozsudy staršich, kiž njesćelu swoje dźěći do Worklečanskeje šule, ale do němskeje. Hrozy wulki strach pokročowanja a wupřestrjenja tuteje, za serbski lud zahubneje tendency.

Stejimy před rozsudom mjez centralnej serbskej srjedźnej šulu na teritoriju Zarjadniskeho zwjazka “Při Klóšterskej wodźe” abo wariantu t. mj. wulkeje tangenty dweju šulskeju stejnišćow, kiž by zadźěwała narodnym stratam w jeničkim hišće eksistowacym kompaktnym serbskim resp. dwurěčnym teritoriju a zdobom zaručiła krótke šulske puće.

Ličby porodow a šulerjow zakładnych šulow pokazuja jasnje na gmejnje, w kotrymajž stej serbskej srjedźnej šuli tež w přichodźe trěbnej, mjenujce w Ralbicach a Pančicach-Kukowje.

Sadźmy skónčnje jasny signal přećiwo dalšemu deciměrowanju serbskeho sydlenskeho ruma a skrućmy rjap Serbam, kotřiž trjebaja pomoc a podpěru zamołwitych politikarjow. Wočakujemy wot reprezentantow Domowiny a Rady za serbske naležnosće Sakskeje jasnu poziciju nastupajo syć serbskich srjedźnych šulow a absolutne zhromadne wothłosowane pozicije postupowanja na kubłanskim polu.

Z přećelnym postrowom

Stefan Rjeda

W mjenje Iniciatiwneje skupiny za zachowanje Serbskeje srjedźneje “Šule Ćišinskeho” w Pančicach-Kukowje

[za našu šulu] [Aktuelles] [serbske nowiny] [sächsische zeitung] [karty/Karten] [brief kreistag] [brief kultus] [eu-komission] [gmejnska rada/gemeinderat] [Nitzsche CDU] [SPD im Kreistag] [Petra Kockert] [Kreistag 08.03.06] [Reaktionen/reakcije] [gmejnska rada/Gemeinderat] [Petitionsausschuss] [list domowinje]